వరల్డ్ కప్‌లో లియోనెల్ మెస్సీ విశ్వరూపం.. పలు రికార్డులు బద్దలు కొడుతూ ఆల్‌టైమ్ హిస్టరీ!

ఫుట్‌బాల్ దిగ్గజం, అర్జెంటినా కెప్టెన్ లియోనెల్ మెస్సీ ఫుట్‌బాల్ చరిత్రలో తన పేరును సువర్ణాక్షరాలతో లిఖించుకున్నాడు. అమెరికాలోని డల్లాస్ స్టేడియంలో సోమవారం జరిగిన ఫిఫా వరల్డ్ కప్ గ్రూప్-జె మ్యాచ్‌లో ఆస్ట్రియాపై 2-0 తేడాతో అర్జెంటినా ఘన విజయం సాధించింది. ఈ మ్యాచ్‌లో 38 ఏళ్ల మెస్సీ రెండు గోల్స్ సాధించి, పురుషుల ఫిఫా ప్రపంచ కప్ చరిత్రలోనే అత్యధిక గోల్స్ చేసిన 'ఆల్‌టైమ్ లీడింగ్ గోల్‌స్కోరర్'గా సరికొత్త ప్రపంచ రికార్డు సృష్టించాడు. తన కెరీర్‌లో రికార్డు స్థాయిలో 6వ ప్రపంచ కప్ ఆడుతున్న మెస్సీ.. ఈ మ్యాచ్‌తో తన అంతర్జాతీయ టోర్నీ గోల్స్ సంఖ్యను 18కి చేర్చడం విశేషం.

మ్యాచ్ ప్రారంభంలో మెస్సీ ఒక పెనాల్టీ ఛాన్స్‌ను మిస్ చేసినప్పటికీ, ఆ తర్వాత తన మార్క్ ఆటతీరుతో పుంజుకున్నాడు. మ్యాచ్ 38వ నిమిషంలో మెస్సీ తన కెరీర్‌లో 17వ వరల్డ్ కప్ గోల్ కొట్టి జర్మనీకి చెందిన మిరోస్లావ్ క్లోజ్ (16 గోల్స్) రికార్డును అధిగమించాడు. అనంతరం మ్యాచ్ ఆఖరి నిమిషంలో (స్ట్రాపేజ్ టైమ్) మరో గోల్ చేసి జట్టు విజయాన్ని ఖాయం చేయడంతో పాటు గ్రూప్‌లో అర్జెంటినాను టాప్‌ పొజిషన్‌లో నిలిపాడు. టోర్నీ తొలి మ్యాచ్‌లో అల్జీరియాపై హాట్రిక్ సాధించిన మెస్సీ, ఈ మ్యాచ్‌లో రెండు గోల్స్ చేయడంతో ప్రస్తుత టోర్నీలో అర్జెంటినా చేసిన మొత్తం 5 గోల్స్ ఈ స్టార్ బూట్ల నుంచే రావడం గమనార్హం. ఈ విజయంతో డిఫెండింగ్ ఛాంపియన్ అయిన అర్జెంటినా ఈ టోర్నమెంట్‌లో నాకౌట్ దశకు అధికారికంగా అర్హత సాధించింది.

ఈ చారిత్రాత్మక ఘనత సాధించిన అనంతరం స్టేడియంలోని అభిమానులు, సహచర ఆటగాళ్లు మెస్సీని ఎత్తుకుని సంబరాలు చేసుకున్నారు. ఈ మ్యాచ్ ద్వారా మెస్సీ మరికొన్ని మైలురాళ్లను అందుకున్నట్లు గిన్నిస్ వరల్డ్ రికార్డ్స్ ధ్రువీకరించింది. ప్రపంచ కప్‌లో అత్యధిక మ్యాచ్‌లు (28), అత్యధిక విజయాలు (18) సాధించడంతోపాటు మైదానంలో  అత్యధిక నిమిషాలు (2,489)  గడిపిన ఆటగాడిగా మెస్సీ కొత్త చరిత్ర సృష్టించాడు.